جايزة أم مثالية


“شروط ترشيح”

قعدت أحسبها وأعيدها
وألملمها مفيش فايدة
ومش جاية!

معايا الحسبة مش هي
تملي ناقصة مش زايدة !

- إعلان -

ده هم يا ربي ولا بلا ؟
تعب وغلا ومش رايدة

أزود همهم بيا.. هافرحهم
وأقول الحاجة مقضية

وإيه يعني؟ هتتقضى
بدل ما تصيبهم الخضة

لآخر الشهر ولا حتى
جنيه فضة!!!

يا أم العيشة وسنينها
وتفانينها في حال الخلق

ما هي عاكسة وأنا لايصة

مرتب شهر ضاع ف يومين
فاتورة كهربا مع غاز
وميه وانبوبة بوتاجاز

وجمعية وفاتورة نت شهرية
عشان الواد بيتعلم
ودواء للبنت لأجل تفوق وتتكلم

يا نور عيني شفاك الله
وعافاك يارب نجاة

وتنطق بس وتقول آه
أنا يا أمي عارفاكي

يا رب مجيب يكون ليها
ف دعايا نصيب

3 صبيان وفي التعليم
وربي عليم بحال الناس

وبنتين لسه عاوزين مال
كتاف نخت بحمل جبال

يا أم الفكر والتشويش
بقيت شيش بيش
ودمع مفيش عشان غالي

كفاية دموع
وهاضحك والله على حالي

ما أنا طول عمري مرضية
وقالوا أم مثالية !!

لكن لا طلعت في التلفاز
ولا في إذاعة مصرية

عشان الأب مش ميت
لكن ميت على حاله

ولا عيان لكن عيان
بأحواله
وساب الحمل لجماله

يهنيه وينصلح باله
بأفعاله

ونرجع تاني للإعلان
ده بيقول إيه؟ نبص كمان

تكون الأم مصرية
ولادها اتعلموا كويس

ولو فيه حالة مرضية
لها شهادة أنها بتدرس

وأنا بنتي اللي فاقدة النطق
ما تنفعش الشروط فيها

دي حالة إزاي أخبيها؟

وتاني شرط في الإعلان
يكونوا اتعلموا الصبيان
علام عالي
بحمد الله يطابق شرطهم حالي

لكن والله ما اشتغلوا
ودايخين شغل براني

صرفت عليهم الغالي
وقال تعليم ومجاني!
لغاية إمتى هنعاني؟

وتالت شرط
تكون الأم في الخمسين
يا ليلتي الطين
ده أنا اتجوزت في العشرين

عيالي شباب ولسه الناس
بيفتكروهم أخواتي

ما هم العمر وحياتي
شبابي محسش الفرحة
إلا وياهم

ونيجي لشرطنا الآتي
يكونوا ثلاثة مش خمسة
يادي الوكسة

ما راحت فرصة الترشيح
مفيش فرصة

وهاستني السنين الجاية
يمكن أقدر أترشح
لجايزة أم مثالية

لكن لأه ، والله ما هي فارقة
ده أنا الأنسب وأنا الأقرب
وبرضه بحالي مرضية

كفاية إن روحي عاشقة لولادي


كسرت الصخر بعنادي

وعندي بنية هي الجنة
في ميعادي

وهاعلن بكره
إن الجايزة علشاني

ما أنا سامعة وبوداني
ولادي بيهتفوا ليا بحنية

يا ست الكل يا أحلى أم مصرية
يا أمنا احنا جبنا قلبنا
هدية

وحطينا الشروط قبلك
يا أغلى أم مثالية

رؤية_اجتماعية

بقلم رئيس القسم الأدبي

د. عزة محمود علي حسن

custom1
قد يعجبك ايضا