خليك مطرحك(حوار وداع)


خالد المنصوري/مصر
(هو)
يا شايلة الحب ف ايديكِ
وقافلة العيون بقفلين
يا زارعة الورد حواليكِ
لكنك شوكة ف الكفين
هقولك كلمة والكلمة تجر الكلمة
ومش عارف هتوصل فين.

لقانا ف يوم ده كان محنة
ومرت بس بين اتنين
لا طالت نور ولا ضلمة
ووقفت نقطة بين سطرين

أقولك….بلاش أحكي
ولا أقولك كلام كتير قلته
معدش يفيد ولا يفرق
تروحي شمال تروحي يمين
تغيبي عن عيوني سنين…ولا تفرق

- إعلان -

لو هتيجي في يوم تقولي سماح
عمري ما هسمعلك
ولا ممكن ف يوم أرجعلك
اه أسف نسيت..اقولك
كلمة سماح عمرك ما قلتيها
ولا اسفة في يوم نطقتيها

أنا مش ملاك..ولا عايز أجرحك
وبقفل صفحة كانت النهايه
وبقولك..خليكِ مطرحك.
………………………………
(هي)
خليك انت مطرحك
ولا تجرحني ولا اجرحك
ده العمر هسيبك تعيشو
ولا كلامي راح يدبحك

جاي دلوقت تودعني
ماانت زمان كنت بايعني
ملقتش منك اي اهتمام
او لحظة حنان تقول راعتني
.
كنت ساكته ومخبيه
والدموع ماليه عنيا
يوم ماسبت الوداع
يمشي ف طريق الاذيه
.
من يومها قلبي خايف
كل شئ عنده زايف
بدأت انت الفراق
ياتري مين يقول اسف
.
يمكن علي وشي يبان
الجحود والنسيان
بس لاخر مره صدقني
قلبي مات من الخذلان

لا هاعاني بعدك ولا هرجعلك
ابعد وسبني اعيش حياتي
خليك ذكري ومش راح اخدعك
وبكل ود هاقولك خليك مطرحك

خالد المنصوري/مصر

custom1
قد يعجبك ايضا