غمست كلمتين

غمست كلمتين

الشاعر :عاطف محمد..

غمست كلمتين
من طبق الكلام
وقولت احلى بيهم
بصيت شمال ويمين
علشان اسأل عليهم
واشوف حل المراره
أو طعم يدارى فيهم
ياعالم ماتغيتونا
حد ينادى عليهم
ويشدهم لبره
ويقصص طرف ليهم
رحت لحكيم وقالى
مرارة الكلام
مش ف الكلام بذاته
المر مننا
بنصنع غلبنا
ونعبى ف حكاياته
ونبروز النكد
ونفطم ذكرياته
قبل الميعاد بيامه
فتظهر احباطاته
ويجى ميعاد رضاعته
يجرجر ف عيطاطه
الحل بسيط وسهل
نعدى حدود آهاته
ولا نرضى بمر أبدا
ونثور على تكويناته
ونفكر نفسنا
بشىء اسمه السعاده
مكتوب ف صفحة بيضا
ف كتاب… خليها عاده
وزيادة ف التأكيد
نعالج مرنا
ف أكتر من عياده
نشرب جرعة فرح
سكرها بالزياده
ولاندى الفرصه أبدا
لنكدنا يبقى عاده
لقيت كلامه صح
راكبله مهره ساده
ونوعها محجلة
وليها غرة بمبى
جاريه على شط وردى
ليها… الطريق منور
لمسجد فيه عباده
قمت اتوضيت وقولت
يارب يارحمان
باسجد واركع إليك
ياخالق الأكوان
لو كان عسلنا مر
حلى كمان وكمان
ومن حدود قدرتك
أدينا م الامان
يارب انت إللى لينا
انقذنا….. يامننان.

- إعلان -

                                            .
custom1
قد يعجبك ايضا