/ كان يومها صيام !/

من تجليات حرب اكتوبر73
الشاعر المقاتل/أحمد عفيفي


كان يومها صيام
و-حسام الغرباوى-م صدًق إن
المفتى سمح بالفطر..وطاح
ف الأكل
حسام على أدً م هوه صعيدى
وفحل..انما جبار
بيعشق ارضه وحالف الف يمين
ليجيب التار
وحسام مغوار وفريد ف الوصف
انا حبًيته
وصاحبته دراع ف دراع
وفرشنا الحلم متاع للجند
حسام بيحب -مجاسن- بنت
خليل شيخون
وخليل شيخون طماع
وحسام محتار وف قلبه
حنين وصراع
لكنه بفرح اتمطً وقام
ولمحت ف وشه غرام
الواد عب القادر دكً
الصهاريج
كان يوها صيام
وحسام بربشلى بطرف عنيه
واديه بتدغدغ علبة -مانجة-
الواد عبـالقادر زعًق فيه
وحسام م سألش ورفع العلبة
ولسه يادوب ح يعين
الدنيا احمرت
واتغيًر لون السما
وحسام الفحل اتمطع/
شيًع صاروخين
الواد عبد القادر هلوس م
الفرحة /الطيارتين
اتبدروا ف لمحة عين
عب القادر سهمه خفيف
م يصدق يفرح يبكى
بحبه خصوصا لمًا بيلضُم
ويًا حسام
كان يومها صيام
وشواشى المغرب بانت
ومعاها سورة – البقرة-
ورنًة صوت الشيخ عب باسط
وحسام الفحل بيبكى
اليوم اربعتاشر من اكتوبر
يعنى التاسع من بدء التار
وحسام ع الشط بيغسل شعره
ومهره بقاله سنين م كملشى
وخايف من شيخون الندل يفرط
ف -محاسن
شيخون خوًان
وحسام معذور- بيفكر ف الحلم
وشارد
عب قادر شاف الدانة وهمً
يشدً حسام
الدانة اترشقت ف حسام
عب قادر حبس الدمً
الدم خلاص بقى نهر
حسام وشوشلى بهمس وقال:
المهر تمام؟!


- إعلان -

الشاعر/أحمد عفيفي

custom1
قد يعجبك ايضا