“كل ميسر لما خلق له”


علموا أولادكم “وَهُوَ الَّذِي جَعَلَكُمْ خَلَائِفَ الْأَرْضِ وَرَفَعَ بَعْضَكُمْ فَوْقَ بَعْضٍ دَرَجَاتٍ”
علموا أولادكم إن “الرزق مش كله فلوس”
علموا أولادكم إن “كل برغوت على أد دمه” و إن “على أد لحافك مد رجليك” و إن “اللي معهوش مايلزموش”

علموا أولادكم إن الرزق بإيد اللي خلقك و كل ما تسعى و تجتهد ربنا هيكافئك .. علموهم إنك لما تبص في رزق غيرك مش هيزود رزقك و هتعيش العمر كله ناقم لإنك مانشغلتش بنفسك و علموهم إن “من راقب الناس مات هما”

علموهم إن رب الكون خلقنا مختلفين متفاوتين و لما تتمنى تعيش حياة غيرك يبقى ع الأقل إتعب و إجتهد زيه .. إتمنى حياته بالحلو و الوحش عشان مافيش حلاوة من غير نار و ماتعرفش قصاد اللي بتحسد غيرك عليه في إيه ناقصه و تخيل إنه ممكن يكون عندك و إنت مش حاسس بيه من كتر ما إنت شاغل بالك بغيرك ..

- إعلان -

علموا أولادكم يبقى عندهم طموح مساوي لقدراتهم و إمكانياتهم و إن نطلع سلمة سلمة و كل ما نحقق خطوة نبص ع اللي بعديها .. علموهم يفخروا بنفسهم و بوظايفهم و بأهاليهم اللي تعبوا عشانهم ..

ماتزرعوش في عيالكوا الطبقية و البص في حاجة غيرهم و ترجعوا تزعلوا لما يمشوا في طريق معووج عشان عاوزين يكسبوا بسرعة ..

لو كلها ملاك أراضي مين هيزرع؟ لو كلها رؤساء مجلس إدارة مين مرؤوسين؟ لو كلها قادة مين جنود؟!
كل واحد فينا ليه دور .. ترس في ماكينة كبيرة بنكمل بعض عشان الحياة تستمر و تستقيم ..

custom1
قد يعجبك ايضا