بقلم/عزة محمود
ما تيجي نكسر البرواز
ونطلع بره ونشوف صح
سنين بتفوت مفيش إنجاز
ورافضين نعترف بالجرح
وجوه إطار دارينا الخوف
وغلفناه ورق سوليفان
بيعكس شيء ماهوش معروف
حكاية لواقع الإنسان
وقفت كتير مع البراويز
لقيت كل البشر عواجيز
ضحايا ف عالم التعجيز
يداروا الخدعة بالألوان
وجوه الروح تبان تجاعيد
رتوش وخدوش برسم الإيد
مهارة الرسم مش هتفيد
وعجزت ريشة الفنان
وف البرواز في ركن هناك
صبية طلة م الشباك
عيون طاهرة ف شكل ملاك
دموعها حبيسة الجدران
بتترجى الجدار ينهار
وتحكي شوية م الأسرار
وحاسة ف صمتها بمرار
وعايشة ف غربة الأحزان
وقلب اللوحة كف وعين
وصورة لبنت بضفيرتين
وشاب جميل مالوش دراعين
وطفل يتيم بدون عنوان
وشيخ عاجز ف إيده رغيف
وبياع ورد خد له رصيف
وجوه تايهة بلا تعريف
وكله ف حاله كان ياما كان
لقيت روحي بشد الخيط
رفعت الصورة من ع الحيط
بافك إطارها م التربيط
وباعلن إن أنا إنسان
لقيت منها أيادي كتير
بتصرخ رافضة للتغيير
وأخدتني معاها أسير
بحجة إنها في أمان
لقيتني حبيسة البرواز
في نفس الصورة تحت قزاز
سنين بتفوت بدون إنجاز
حكاية لواقع الإنسان