/ أنا موش نبى! /
قلبي ملايكى وأنسنوه
سحبوه من الجنه/
ورموه ف الارض
م لقيتشى حدً يلمًنى ويسمًى
آاااه وعافرت وحدى وتُهت
منى وبان ف قلبى نزيف
سبعين خريف وانا زى طور
متغمًى فى ساقية وبدور
من غير م أسأل سؤال
فكًرت أقول موًال أو أغنًِى
غِنوه قبل م اموت
الأرض حرً وبرد وفيها من
صنفى الكتير وهواها موت
حلمت ليلة بإنى غُصت ف
بحر/غرقت ف بطن حوت
والحوت طِلع شهم ونبيل
م رضاش ياكُلنى وبخًنى
وسألته عن يونس فقاللى ده
كان نبى
وانا كُنت يومها حوت صبى
والرب قاللى اتوصًى بيه
والوقت انا حوت عجوز
وبرغم انك موش نبى
ويجوزلى أكلك ياخفيف
لكن صُعبت عليًه/فارجع
للشطوط وايًاك تغوص ف
البحر تانى
وصحيت من الحلم الجميل
على صوت هوس صحًانى
الأرض فضيت م النخيل
وبقت بواااار/ ومبانى عاليه
وليل طويل
والخيل بقى همدان مفهوش
صهيل
سبعين خريف م قدرتش
أتهنًى ف يوم بشبابى فيهم
وانكفيت على حُرقتى
وحاولت إنى أكون شفيف
لكنًى تُهت ف دنيا غدًاره
وجحدت مطلبى
يونس برئ وانا زيه بس
الفرق إنى موش نبى!
الشاعر/أحمد عفيفي
مصر