بقلم الشاعرة / رضا عبدالمطلب
متابعة / سامح الخطيب
اخر حدود الحلم
شفنا يادوب خيالات
بتمر ف شريط فيلم
وبتقتل اللذات
وساعات نفوق ع الهم
وبنستعيذ بالله
نرجع نعيد الحلم
ونعيشه جوه الذات
اول حدود الوهم
كنا يادوب ماشيين
راح كل حبة ف قطر
واتفرقوا القطرين
قضبان وكان غضبان
حلف ما حيكمل
شفنا الحرايق نار
نطفيها بتكمل
خدتنا سكة دمار
ما قدرنا نتحمل
بنعالج الاموات..
وبندفن الصاحيين
اخر حدود الظلم
يارب كون ف العون
استرنا فوق الارض
وانجدنا من فرعون
ونصلي سنة وفرض
نملك سعادة الكون
اخر حدود الخوف
حلم الغلابة رغيف
واللعب ع المكشوف
بس بإيدين حريف
صفيتوا دم الوف
والعيشة مر وزيف
اخر حدود الصبر
ضيعتوا خط العبور
الدود نهش ف القبر
وانتو بتبنوا قصور
يامزوقين الكلام
والفعل غش زور
بعتوا الغلابة بكام
ومين عليه الدور