بقلم : علاء عامر
الخير شح
والبركة بح
وقلوب الناس
عايشة فى وسواس
خايفة لو بكرة ما جاش.
حياتها ازاى تتعاش
تضرب اخماس
على اسداس
تجمع وتطرح
تضرب وتقسم
بورقة وقلم
وتحسب حسبتها
وتفك معادلتها
بالسحتوت..
اهو يوم وبيفوت.
بتنقص فية أيامك.
مش شايف احلامك.
دايرة جواها دايرة.
بتشد فيها بالعافية.
وتشد هية بالعامية.
ساقية بألف ساقية.
وحمل.ونفس ساقية.
تجيبك وتجيب اخرك
تلف فيك وتخليك
ما تعرف فين عمرك
ما تشوف فيها نفسك.
ما تحس فيها بسعادتك.
غير وانت ميت!