اوعاك يوم تقولي
دول أحباب
لو كان حبهم صادق
ما كان لحظة غاب
الحب ما يعرفش غير
اللقا ولمة الأصحاب
وإزاى تضحي بعمرك
وتفتح للحب باب
………………………….
جوايا صرخة ألم
في القلب مكبوتة
حالنا أصبح عدم
نعمل منه حدوتة
عنوانها دنيا الهنا
وهى بالهم ملتوتة
………………………….
يا بياعين الكلام
همس وغنا وحروف
للفرح نرصف طريق
وجوانا نزعة خوف
نرسم الضحكة صافية
والحزن فينا يطوف
نغني للحب مرة
وللجرح نغني ألوف
نوصف للأحبة الدوا
ودوانا مش معروف
……………………………..
فاتحين عيونا بعجب
لكن مش بنشوف
نجري ورا الألوان
تغطي وشوش وظروف
نخدع روحنا بإيدينا
ونقول دا أصله عطوف
ولما نضل الطريق
يسكنا حزن وخوف
هو العيب فى العيون
واللا القلب كان مكفوف
ملعون قلبي اللي حبك
وقال حبيب موصوف
……………………………….
بقلم / مصطفي كرم