أعداد / داليا محمد
في مشهد مؤلم جدا في فيلم
( war for the planet of tha apes)
، لما ابطال الفيلم قابلوا في رحلتهم قرد كبير في السن ، هربان من سجون الجنود الأمريكان ،وعايش لوحده في أحد الكهوف من سنين .
استنى…
المؤلم في المشهد. مش إنه عايش لوحدة فترة طويله جدا في كهف مظلم .
المؤلم إنه لما جه يعرفهم بنفسه قالهم إن اسمه : باد إيب bad ape
(القرد السئ)
كان غريب جدا إن حد يعرف نفسه بالاسم ده .. بس بعدها فورا تقدر تفهم ان ده اللقب للي كانوا بينادوه بيه الجنود الامريكان . . كانوا كل اما يشوفوه يقولوا له ( باد إيب).. كل اما يندهوا عليه يقولوا له ( باد إيب) ..كل اما يطاردوه او يعاقبوه يقولوا له ( باد إيب)
طيب إيه برده المؤلم في ده …
المؤلم في ده إنه صدق ان ده اسمه فعلا …واقتنع إن دي صفته .. وبدأ يعرف الناس بيه علي انه ( باد إيب ).
صعب جدا …ومؤلم جدا .
بس ده البعد الاول فقط من الألم اللي انا اقصده .
البعدالثاني من الألم ده هو إن احنا نفسنا ساعات بنعمل كده … وبنعمل كده مع الناس اللي بنحبهم … مع اقرب الناس لينا .. مع اولادنا … مع ازواجنا وزوجاتنا…مع اخواتنا .. مع زمايلنا في الشغل …مع اصحابنا
وزاي ما احنا ساعات بنعمل كده ….إحنا كمان ياما اتعمل فينا ده
يعني الزوجه اللي جوزها طول الوقت يقول لها انتي مقصره … إنتي ما بتفهميش.. إنتي نكديه . إنتي جايباني لورا .. إنتي فاشلة .. إنتي افشلتي حياتي .. هي بعد شويه بتصدق ده عن نفسها ، وتتهز ثقتها بيها ، وتتكون عندها صوره ذاتية سيئه جدا .. وتبدأ تتعامل مع نفسها ومع جوزها ومه كل الناس علي إنها فعلا مقصرة ، ومش بتفهم ، ونادية، وفاشله .. هي بتبدأ _ حرفيا _ تشك في نفسها .
الولد اللي اهله بيوصلوا له دايما إنه وحش .. مش كويس… سيئ .. مش بيسمع الكلام … دايما غلط .. اقل من فلان وعلان .. هو برضه بعد شويه بيصدق ده عن نفسه … ويتعامل بيه معاهم ومع كل اللي حواليه .
البنت اللي بيوصلها من اهلها وناسها ومجتمعها إن جسمها ذنب ، وإن وجودها إثم ، وانها قليله وصغيره وما تستاهلش .. شويه شويه هتصدق ده ، وتتعامل بيه ، ومش هتشوف غيره ، وممكن تدافع عنه وكمان تهاجم أي حد يحاول يعرفها حقوقها ويفتح عينيها .
يااااه …قد ايه احنا مصدقين عن نفسنا حاجات كتير قوي … وهي في الحقيقة ….مش حقيقه.
من كتاب لأ بطعم الفلامنكو للدكتور محمد طه
تابعونا على قناة جريدة نسر العروبة يوتيوب