بقلم الشاعر / رضا ابو الغيط
متابعة / سامح الخطيب
بدون ما أشعر
لقيت نفسى ف طريق مسدود
ودود الأرض مستنى
يدوق لحمى اللى غطا العود
وشد بطرفه أكفانى
وبكانى
بصوت يشبه أنين العود
وقال يا غريب
شبابك فين ؟
وفين نبوتك القاسى على المخاليق؟
وفين صبرك ف وقت الضيق؟
وفين الأهل والصُحبه ؟
وصاحبة الناس بتوصفها
جمال خارق وماله حدود
وفين مالَك ؟
ومالٍك ع الببان موجود
بيستنى اللى عاش يظلم ف خلق الله
وخطا حدود
خلاص يا غريب
ماعاد ينفع تعود للدنيا من تانى
وتبنى قصور
ماعاد ينفع تعود تانى
لتوب كستور
خلاص يا غريب
كفاية غرور
شهودك أكدوا إنك عشقت الجور
وصفحة عملك الطيب
بتشبه أرض عطشانه ضناها البور
وصعب تجود
على جتة ف إيد الدود
كفاية غرور
ياشاهد زور على الدنيا وع الأوضاع
ما عدش متاع
ولا عادت للرشاوى جيوب
خلاص يا غريب
ما ينفعشى ف الليلة دى تتوب
بقيت مزنوق
مابين أعمالك السوده وحضن الطوب
وتوب عارف
بإنى العُمر بيسافر ومش هيعود