في حبُ إسكندريه

نسمة الصُبح النديّه
والعيون المستحيّة
والمطر ع الورد لبيض
والنسايم…رايحه جايه
اخدوا روحي ..ولعبوا بيه
طرت ويّا حروفي
ريشه
وإترسم جوايا …ديّه
قلت ماله..بان جماله
حكم ربّك ف الخلايق
.اصلي رايق
والجمال..سر البريّه
رُحت كاتب
كلمه حلوة
ف قلب غنوة
م الجمال …القلب عبّا
حبه حبه
الكلام سرسب معايا
والجُمل صبحت عفيّة
والخيال طيّر عواطفي
للامور المتداريه
شُفت موجه حاضنه موجه
حتي همس الشوق سمعته
والغرام والحب شفته!
.روحي بتكدّب عنيّه
شجره بتمدد كفوفها!!
والنسيم لو عاز يشوفها
ينطلق يلمس حروفها …
ترمي روحها
.بنت عشقانه وشقيّه
جاي ..طير فارد جناحه
.شايل الشمس ف براحه
لويحب النور يعدي او يهدّي
يلم ريشه….عشان يعيشوا
يترك الاشواق شويه
تبتدي قلوب العذاري والحياري
يلقطوا ..حب المحبه
اللي دايما يسخبي
جوه كل عيون صبيه
قلت.. روحي ناسيه روحي
و الغرام علّم في قلبي
والقمر زغلل عنيّه
نسمه رايحه كإني طاير
في السما..
بشويش عليّه
قلبي دق لنظره ساهيه
بس ناهيه..
من عيون بنت اللذينا
اسكندريه
•••••••
فوزي السيد