بقلم الشاعر / رضا أبو الغيط
متابعة / سامح الخطيب
مع قمر الليل اللى بيسهر
فوق سطح الدار
بسهر مع ألمى وكراسى
نكتب أشعار
وأستنى النجمة اللى ما زارت
قلبى المحتار
تفرد جناحتها وتحدف لى
بير الأسرار
وأشمر قلبى اللى ماهمه
سراديب البير
وأغوص للقعر اللى بيخفى
كام سر خطير
واسأل عن قلب اللى هواها
قلبى المسكين
وأسمع دقاته اللى بتعزف
كام لحن حزين
يمكن يحكى لى ويشرح لى
كان ايه خلاه
ينسى اللى اتعذب من بَعده
وف إيده دواه
ينسى اللى بيسهر صباحى
مع قولة آه
يمكن توصله دموع عينى
وتقوله ع اللى مبكينى
ومبكى قلبى اللى نهار
يمكن تلمحنى عيون قلبه
وتقول حبيبي انى بحبه
ويطفى النار
ويعود للحضن المشتاق له
ليل ويا نهار