كتبت / سمر فرج محمد المصري..
هل من الممكن ان سلوك يتغير هذا ما سوف تعرفه في مقال اليوم
يعنى أيه سلوك إنسانى ؟
السلوك عبارة عن أى فعل أو نشاط يصدر عن الإنسان ، سواء كان النشاط ظاهر أو غير ظاهر .
يعنى الكلام سلوك ، و اللعب سلوك ، و الأكل سلوك ، و الكذب سلوك ، و السرقة سلوك ، و الصدق سلوك ، و الخجل سلوك وهكذا …
هل السلوك الإنسانى ممكن يتغير ؟
طبعا ممكن سلوك الفرد يتغير ، و دة لسبب بسيط جدا و هو ” التكيف مع الوسط و المجتمع المحيط ”
علي سبيل المثال
حالياً لو طفل وقع الكباية على الأرض غصب عنه فاتكسرت ، الولد جرى من مكان الكباية المكسورة ، ماما جت من الشغل متعصبه و بتسأل مين اللى كسر الكباية ، الطفل ” كذب ” عشان خايف ماما تضربه .
( الطفل دة غالبا بيكون صادق و مش بيكذب ،ولكن لما حس ان ماما ممكن تضربه ” اتغير سلوكه ” )
و طبعا السلوك ممكن يتغير من سلوك سوى لسلوك غير سوى ، أو العكس ..
إيه السلوكيات اللى اتدخل و اعدلها من خلال استراتيجيات تعديل السلوك
لكي تعرف الاجابة يجب أن تعرف أولا
ان كل نشاط ممكن نعمله ليه اتجاهين
اتجاة موجب ( السلوك السوى )
اتجاة سالب ( السلوك المضطرب الخاطئ )
و طبعا بحتاج أعدل السلوكيات المضطربة (الخاطئة)
علي سبيل المثال على الاتجاه السالب و الموجب للسلوك :
نفس المثال بتاع الكباية ، دلوقتى الطفل وقع الكباية على الأرض و اتكسرت ، و ماما كانت متعصبة جدا و سألته ؛ مين كسرها ؟
الطفل هنا هيعمل ” نشاط لغوى ” او سلوك لغوى ،
ليه اتجاهين
1 _ الاتجاه الاول : الطفل هيقول لماما انه هو اللى وقعها و اتأسفلها و مش هيعمل كدة تانى ( سلوك الصدق ” سلوك سوى ” )
2 _ الاتجاه الثانى : الطفل هيكذب على ماما و يقولها مش أنا اللى وقعت الكباية ( سلوك الكذب ” سلوك مضطرب ” )
انا هنا عاوز اعدل سلوك مضطرب ( الكذب )
ولكن مش أى سلوك مضطرب أتدخل معاه بشكل فورى و اعدله ، فى اساسيات و حاجات كتير جدا لازم نعرفها عشان نتدخل و نعدل السلوك ،
ان الاتجاه السالب للسلوك بيكون غير سوى .
أها صح ، بس سؤال ، هل كل السلوكيات السالبة محتاجة تعديل سلوك ؟
لا طبعا ، لأن مش كل سلوك سالب هيكون سلوك غير سوى
حالياً يا جماعة لازم يتوافر مجموعة من شروط لكي اقدر اقول ان السلوك غير سوى و محتاج تعديل سلوك
علي سبيل مثال
لو طفل فى حضانة ( اكبر من 4 سنوات ) عنده سلوك مص الأصابع ، كلنا هنكون متفقين ان دة سلوك غير سوى ، و بالتالى هنحتاج نعدل السلوك ..
أما لو طفل عمره أقل من ( 3 سنوات ) و عنده سلوك مص الأصابع ، فأحب اقولك ان السلوك دة طبيعى جدا ..
لان الطفل فى السن دة بيتعرف على كل شئ حواليه عن طريق لسانه حتى ايده هتلاقيه حاططها فى بوقه فى أغلب الأوقات ..
بمعني ليس كل الأوقات سلوك مص الأصابع بيحتاج تعديل سلوك ..
- ان يكون السلوك غير مناسب مع عمر الحالة .
- ان يكون السلوك متكرر لمدة ( 3 شهور ) و التكرار على مستوى الزمان و المكان . يعنى بيتكرر فى مواعيد مختلفة و مواقف مختلفة و فى اى مكان مش مكان محدد .
يعنى هستنى على السلوك الغلط لمدة 3 شهور منغير تدخل ؟؟
لا طبعا ، بنستخدم معاهم أساليب معينة ( لكل سلوك أسلوب معين ) علشان نحد من تقدم السلوك الغير سوى .( مجرد إرشاد أسرى )
أما وضع الخطة لتعديل السلوك و التركيز على تعديل السلوك و الطفل ، مش بنستخدمه الا بعد ما نتأكد ان السلوك دة متكرر .
و بكدة نقدر نقول ؛
أول هدف من أهداف تعديل السلوك : إزالة السلوك المضطرب الغير سوى و استبداله بسلوك سوى .