يعني واخد الهم حصرى
بالاسم عايش بالفعل منسي
يوصل الليل بالنهار
كل يوم علي بوزه مكفي
ومش مكفي اي حاجه
بس يكفي انه مصرى
مصرى عادي
يعني ابوه ع الاد خالص
يعني لا بيه ولا ابن ايه
ولا حلته اي حاجه خالص
ماشي زء ميقلش لاء
لانه ببساطه مواطن عادي
يعني من يوم مولده لمماته
راضي بكل حاجه خالص
شارب المر بسعاده
وعنده عاده لما يلاقي
الموجه عاليه تلاقيه يطاطي
حتي لو مجتش موجه
بردو مطاطي
اصله مصرى عادي يعني
لابن بيه ولابن ايه
ولا ابن قاضي
وبرغم انه مرغوم تملي
يعيش وراضي
شايف ان بكره احلي
واللي فات دا كله ماضي
مصرى عادي
يعني غلب ايوب ف صبره
يعني غلب يوسف ف بلاه
يعني حلم بكره عنده
يوم ما يتعب ويقول اه
يلاقي حد يحس بيه
مايحسسوش انه عادي
ـــــــــــــــ
طاهر
مواطن عادي
ما هو رد فعلك؟
حب0
حزين0
سعيدة0
غاضب0
غمزة0