بقلم / على حزين
أنا مجنون ..
وجنوني غير عادي
أكلم نفسي ساعات , وأضحك عادي
وساعات أبكي بكى غير عادي
وساعات أحزن حزن غير عادي
وساعات أفرح , وساعات أقول عادي
وساعات أحس إحساس غريب غير عادي
وساعات أحس إني ملَك بجناحين
طير في الفضاء ما يحده وسع الكون
وساعات أحس إني مسجون
وحامل فوق راسي هموم الكون
وساعات أنادي على نفسي بصوت عالي
وأجري أرد علي نفسي عادي
وساعات أضحك علي نفسي ضحك غير عادي
وساعات أحس إني عاقل
وساعات أحس إني مجنون
أرقص وأغني مع نفسي
وأحزن وأفرح عادي
وساعات أسال نفسي سؤال غير عادي
مين أنا , ومين أكون ,
أنا عاقل , ولا مجنون ..؟..
ولا أنا إنسان طبيعي عادي ..؟,
ولا غير عادي ..؟..
وأقول لنفسي : يا نفسي أنا لوحدي كده
ولا في زيي كتير عادي
وساعات أحس نفسي نبي
وساعات أحس إني غبي
وساعات أحس إني ملَك كريم
وساعات أحس إني شيطان رجيم
وساعات أحس إني مهم جداً
وساعات أحس إني تافه
وساعات أحس كلامي موزون
وساعات أحس إني مجنون
وجنوني ما له مثيل في الكون
وجنوني غير عادي
وساعات أحس بالسعادة والهنا
وساعات أحس بالحزن والأسى
وساعات أحس إني أنا مش أنا
وساعات أبص لنفسي في المرايه
وأقول لنفسي : يا أنا : مين أنا ..؟!
وما سري أنا , ومن أكون ,
وأتوه بين الـ أنا والـ أنا
أنا كلمة في كتاب الكون
أنا سر مكنون ,
وعمري بعمر الكون
واتجمعت فيَّ كل التناقضات
يا أنا : ليتني أعرف من أنا
وساعات أحس إني غريب في الكون
يا ترى أنا عاقل ولا أنا مجنون
وجنوني غير عادي
تمت مساء الأربعاء 5/ 8 / 2020
على السيد محمد حزين ــ طهطا ــ سوهاج ــ مصر